TerPlekkePodiumPoeem 4 april

PROVINCIE - OPKAOMER
Een dikke poest trök deur de reven
't ak gung der of
ales is weer beaord nou
um te gaon naor:

't kaomerorkest met koor derbij
meziek maoken vanoet graogte
met plezeer e toonledder op en of
veurjaorsstemmen klinkt
krokussen bluit op
kruusbestoevings vind plaots
't begunde as een orkestie in Zuudlaoren
en kaomerde zuch klaankriek
(der is nog stee veur wel de fiedel wul strieken)
hen en weer en op en neer
geeit de klaankbevolking
de meziek die as klinkt
gef zuch klassiek weer
en de haan van wat veurstèeld wodt
dan volgt 't regeln
dan komp 't teveurschien op
de opkaomer van plezeer
in 't veurjaor
opteeikend deur componisten
alerhaand

een aandere teeikent
gef vörm en
pres zuch slim bliede
(wel nog meer met an deden
deden een stap opzied
um 't beeild en de pecunia
in heur haanden te laoten belaanden)
van binnenoet gef 't zuch weer
nao aorzeling 't in en an 't locht braacht
daor steeit 't dan
daor toont zuch wat in leven kommen is
wat de ogen zeeit komp op verhaol veur aandere ogen
kaoders wod anlèegd deur opdraachten
en dan is er de vrijheid
de witte muur
die as waacht op de regenboog
taol en teeikens spreekt zuch oet
in een flow
in boouken
in een rapport dat de vrije, eigen haand
op de eigen weg belochtte

wat er toendertied klunk
in een umgeving van levensleegte
klinkt weer in dizze tied
de aachtergrond is die van
umstaandigheden
die klinkt in bijnao vergaone herinnerings
meziek dreuig de dood naor wieder weg
de aangst was even stil en
kleurde zuch bont
de mèensen wolden vergeten
wat wij oous nou weer laot klinken
tied geeit opzied
tied keert weerum
tied geeit veurbij
meziek blaodert zuch een weg
deur tied en ruumte
tied steeit even stil en
aodemt guster
naor hier en nou .......

© Egbert Hovenkamp II

💬 WhatsApp ons!
Heb jij een tip voor de redactie? Stuur ons een bericht, foto of video via WhatsApp: +31651568886 of mail naar redactie@rtvdrenthe.nl