Het meisje heeft een ringetje om haar vingertje

PROVINCIE - Vandaog pak wij een lange zin bij de kop: het meisje heeft een ringetje om haar vingertje. Dreei verkleinwoorden in eein zin, en toch is der veur dizze drei woorden een heeil verschillend beeld over Drenthe.
Allereerst het meisje. Vanolds hew daor in Drenthe dreei woorden veur. ‘t Wichie komp ‘t meeiste veur. In Noord, midden en zuud-oost-Drenthe. In de omgeving van Slien en Börger en wiederop op de Hondsrug komp ok wichtie of wichtien veur. Wichtien allennig in Slien en directe omgeving. Maegie zeggen ze op De Smilde, in Diever en Dwingel, Wapse en Wapservene. Die ae-klank zit beveurbeeld ok in waeter en maeken, glaezen en aepen.
In Zuudwest-Drenthe in plaotsen as Rune, Runerwold, Zuuwole en ‘t Hoogeveine is ‘t een maagie. Negen keer wordt het nog speld as maagien. En die n an ‘t èende van een verkleinwoord is in ‘t Drèents an ‘t verdwienen.
Dan het verkleinwoord ringetje. In ‘t Drèents kan dat ok weer verschillende vörms annemen. Rinkie in de Veenkolonies. Zowat alle veenkoloniaolen zeggen rinkie. En ok aander woorden op een ng kriegen kie. Beveurbeeld, ding - dinkie, tang - tankie, en zölfs sprong - spronkie.
In de meeiste aander regio’s is ‘t een ringgie. Ringetie en ringegie kommen ok verspreid veur, mor dat lieken mij neie Drèentse vörms, ontstaon deurdat ‘t Nederlaands ‘t Drèents beïnvloed. In oldere bronnen kan ik ringegie en ringetie niet vinden.
En dan het Nederlaandse vingertje. Dat levert ok een mooie Drèentse verdeeiling op. In ‘t noorden van Drenthe en op de Hondsrug is ‘t een vingerie. Hoou wieder oj naor ‘t zuden gaon op de Hondsrug hoou groter de kaans daj vingertie heuren en in ‘t zuden is ‘t overaal vingertie of zölfs vingertien, mor zoas ik bij wichtien en maagien al zee, die slot-n in ‘t Drèentse verkleinwoord is an ‘t oetstaarven.
In de veenkolonies is ‘t een vingertje. Dizze verdeeiling geeit op veur alle woorden as vinger, zoas beveurbeeld bakker, koffer, mor ok woorden op -el zoas sleutel, vogel en winkel.
En dan is der nog eein kwestie waor ik ‘t niet over had heb. Wij vreuigen haar vingertje.
150 mèensken schreven op om de vinger of ‘t vingerie. Heur vinger weur wied oet deur de meeisten opschreven en ok nog een paor deelnemers schrieven um zien vingertie. Eein schreef: In Uffelte was een maagie ok een hij. Hij kun dus een joggie of een maagie wezen.
Abel Darwinkel

💬 WhatsApp ons!
Heb jij een tip voor de redactie? Stuur ons een bericht, foto of video via WhatsApp: +31651568886 of mail naar redactie@rtvdrenthe.nl